ЛЕВИЦА: Во ниту една унитарна држава на постојат две паралелни академии на науки

Добивај вести на Viber

Oд Левица обвинуваат дека Албанската академија на науките е чекор кон федерализација на државата. 

Велат дека со тоа се урнисува унитарноста на Македонија. 

„Имено, новиот партнер на ДПМНЕ во власта, ВРЕДИ, наместо да донесе нови, прогресивни идеи (ослободени од етно-трибализмот), повторно демонстрира дека нивното практикување власт, по над дваесетте години на ДУИ, не значи промена – туку замена. Во ниту една унитарна држава НЕ постојат две паралелни научни академии, затоа што науката не може да биде заробена од етнички концепти. Ваквите етно-шовинистички барања на ВРЕДИ единствено ја продлабочуваат веќе длабоко наметната бинационална држава и дополнително водат кон федерализација“, соопштуваат од Левица. 

Во соопштението додаваат дека ВМРО-ДПМНЕ и ЗНАМ се „изненадени” од ваквите изблици. 

„Потсетуваме дека токму Билал Касами од ВРЕДИ отворено ги има промовирано своите великоалбански претензии, па дури и изјавуваше дека Македонија (после Косово) ќе стане трета албанска држава. Наместо поништување на штетните политики кои длабоко го дезинтегрираа македонското општество и доведоа до негова либанизација, јасно е дека и новата владејачка гарнитура нема капацитет, ниту пак политичка волја за враќање на унитарноста на македонската држава“, велат од Левица. 

За Максим Димитриевски од ЗНАМ, барањето за Албанска академија е постизборен популизам.

Премиерот Христијан Мицкоски вели дека ја имаме МАНУ и дека таму има научници од различни етнички припадности. Инаку, пред избори од Вреди споменуваа и отворање на албанска банка.