Добивај вести на Viber
Целосната либерализација на пазарот на електрична енергија стартува од јануари следната година, што значи дека и граѓаните ќе можат сами на пазарот да изберат кој ќе ги снабдува со струја.
Но, дел од компаниите кои имаат лиценци за снабдување сметаат дека ваквото отворање на пазарот, наместо пониски, ќе донесе повисоки цени од оние што сега ги определува Регулаторната комисија за енергетика.
„На слободниот пазар цената ќе биде многу пониска, но имајте на ум дека треба да се плати и мрежарина. Според тоа, вкупното ќе биде нешто повисоко“, смета Златко Черепналковски, ЕДС.
„Македонија е во различна ситуација, бидејќи успева да покрие само 70% од потребите со сопствено производство на енергија и според мене ова ќе влијае повеќе отколку локалната организација и секако субвенциите ќе мора да се решат, со оглед дека на слободниот пазар субвенции за електрична енергија не постојат“, изјави Гунтер Брамбек, ЕВН.
Либерзализацијата се одвива во повеќе фази - за комапниите што веќе излегоа на слободниот пазар и сами си ја купуваат струјата, тоа донесе поевтинување, додека пак за домаќинставата се очекува обратен процес и поскапување.
Регулаторната комисија за енергетика од денеска ја покачи цената на струјата за 3,45% и најави дека оваа цена ќе важи до 1 јули следната година. Но, според најавите на компаниите-снабдувачи, граѓаните практично можат да очекуваат уште едно поскапување веќе за шест месеци.