Мајката на детето кое настрада во пожарот во Гостивар заврши во притвор
Објавено во: Македонија 17 Март, 2021
Триесет дена притвор определи судија на претходна постапка од Основниот суд Гостивар на мајката чие дете вчера настрада во пожар во стан во Гостивар.
Таа вчера е лишена од слобода под сомнение дека го врзала седумгодишниот син со синџир за нозете, што го отежнало неговото спасување од огнената стихија.
Претходно, Основното јавно обвинителство Гостивар издаде наредба за спроведување истражна постапка против С. Т. (36) од Ресен и живеалиште во Гостивар, поради основано сомнение за сторено кривично дело – Повреда на семејни обврски (член 203 став 2 од Кривичниот законик). Осомничената жена го малтретирала своето дете на возраст од седум години, го врзувала со ланец и катанец за креветот. На 16 март, во станот во кој престојувало семејството избувнал пожар и затоа што било врзано за креветот детето не успеало да го напушти домот и загинало. За кривичното дело за кое е осомничена жената е предвидена казна затвор од најмалку пет години. Останатите малолетни деца на осомничената се згрижени преку Центарот за социјална работа во Гостивар.