Македонците од игри на среќа најмногу обожаваат VLT-апарати

Добивај вести на Viber

Македонците од игрите на среќа најмногу сакаат да играат на VLT-aпаратите а потоа на се друго, покажува последниот независен годишен ревизорски извештај на Државната видеолотарија на Македонија.

Ако се суди според бројките на приходите, најомилена активност од игрите во 2017-та биле овие терминали кои обезбедиле 20 милиони евра вкупен приход. Ова воедно е убедливо најголемата сума, додека интересот за другите игри на среќа, според евидентираните суми, е многу помал.

Клиентите се повеќе покажуваат интерес за овој вид на забава, според потрошените пари кои се зголемиле за една третина по 12 изминати месеци. Ако во 2016-та приходот од овие апарати бил 874 милиони денари, во 2017-та тој изнесувал 1.23 милијарди денари.

Терминалите на овие електронски игри на среќа се поставени кај деловните партнери - обложувалниците и електронските казина низ целата земја со кои се склучени договори.

Кај другите виртуелни игри приходите се далеку помали, така што електронските игри на среќа оствариле 16 милиони денари, додека обложувањето во живо преку интернет забележува 11,7 милиони денари. 

Кај традиционалните игри најмногу средства се обезбедени од „Ново Лото“ во висина од 72 милиони денари во 2017-та, а следуваат „Среќни топчиња“ со 20 милиони денари и „Кено“ со 13,6 милиони. Кај грепките најпопуларни се „Авантура“ со 19 и „Златна Рипка 2“ со 13,6 милиони.

Александар Кузмановски