Манчевски во случајот „Боемска“ гледа неколку кривични дела на Мицкоски
Објавено во: Македонија 06 Јуни, 2020
Министерот за информатичко општество и администрација, Дамјан Манчевски смета дека во посетата на лидерот на ВМРО-ДПМНЕ Христијан Мицкоски има редица на кривични дела.
„Деновиве бевме сведоци на крајно неодговорно однесување од страна на лидерот на ВМРО-ДПМНЕ, Христијан Мицкоски, но она што е уште пострашно е што во дел од неговите изјави тој апсолутно потсетува на едни поранешни времиња, кога власта предводена од ВМРО-ДПМНЕ беше и судија, и полиција, изречител на казни и мерки. Имено не е така едноставно Христијан Мицкоски да каже направив грешка и сега ќе платам казна и тоа е тоа. Во она што се случуваше на улица "Боемска" има редица на кривични дела“, изјави министерот Дамјан Манчевски во своето видеообраќање до јавноста.
Тој вели дека Мицкоски, како и многу пати досега, покажа дека не ги почитува мерките за заштитта од Ковид 19.
„Тоа се покажа и во други примери претходно, ова е веќе кривично дело и не е така едноставно. Правдањето дека не знаел дека не смее да седи во внатрешност на угостителски објект е навистина смешно, сите го знаат тоа и впрочем не требал ни да биде пуштен внатре во објектот“, вели Манчевски.
Додава дека вториот момент за кривично дело е дека спречувале луѓе инспектори, официјални лица во извршување на својата службена должност.
„Овие луѓе 2 часа не беа пуштени да влезат во внатрешноста на угостителски објект само и единствено затоа што таму седел Хритијан Мицкоски со неговото друштво, и ова е кривично дело“, нагласува министерот од СДСМ.