МЕШАНИ БРАКОВИ ВО МАКЕДОНИЈА: Со кого Македонците најчесто одат пред матичар?

Добивај вести на Viber

Македонците најчесто склучуваат мешани бракови со припадниците на српската заедница, и ова може да се забележи од податоците на Државниот завод за статистика за 2017 година.

Лани 69 Македонки стапиле во брак со Срби, а 83 невести од српска националност се омажиле за Македонци.

„Јас и мојот сопруг се запознавме во Хрватска. Мене не ми е толку важна културата или кој од каде е, јас сум со отворени сваќања, но се случи љубов. Не се сложувам дека браковите се чести помеѓу Македонци и Срби заради сличностите кои ги имаат овие народи“- вели Милена Христовска, Србинка која е мажена во Куманово.

Кога станува збор за мешани бракови, веднаш зад Србите по бројност се Албанците.

Голем број Македонци се женат со Албанки од соседна Албанија. На вакви бракови најчесто се решаваат мажите од руралните средини. Во бројки, минатата година 57 жени Албанки се омажиле за Македонци, а 23 Македонки за Албанци.

„Кај нас има во селото има неколку Албанки кои се дојдени пред две години. Има и мешани бракови со луѓе од други националности“ – вели жител на селото Мартолци, кое се наоѓа во Општина Чашка.

Од друга страна во истиот период 9 Турчинки се омажиле за Македонци, а 25 Македонки се венчале со Турци.

Податоците покажуваат дека 7 Влаинки се омажиле за Македонци, додека двојно повеќе Македонки се омажиле за Власи.

„Иако немам точни бројки, сепак во Крушево и порано и ден  денес има бракови меѓу Македонци и Власи“- вели жителка на овој град. 

12 Бошњачки лани се омажиле за Македонци и исто толку Македонки за Бошњаци.

Има 8 регистрирани бракови меѓу младоженец Македонец и Ромка, и исто толку помеѓу Ром и Македонка, покажуваат статистиките.