МИРЈАНА НАЈЧЕВСКА: И во Арачиново плаќаат данок, ама на мафијата, а не на државата
Објавено во: Македонија 06 Април, 2021
Професорката Мирјана Најчевска вели дека грешат оние што мислат дека очичните луѓе во Арачиново не плаќаат данок. Таа вели дека плаќаат, но не на државата, туку на мафијата.
„Тие кои мислат дека обичните луѓе од Арачиново не плаќаат данок многу грешат.
Тие плаќаат и некогаш и дупло повеќе, само што не плаќаат на државата туку на мафијата.
Тоа што државата дозволува постоење на мафија и не ги штити луѓето од неа е главниот проблем“, пишува Најчевска во својот пост објавен на фејсбук.
Како што е познато, градоначалничката на Арачиново, Милитие Халими, неодамна излезе со објаснување зошто оваа општина е единствена во Македонија што нема ниту еден денар собрано од данок на имот, и според неа, причина за тоа е што општината има голем број на дивоградби, за чии жители е тешко да ги легализираат.
„Општина Арачиново за жал има и голем број на корисници на социјална помош. Секако проблемите со дивоградбите од минатото и финансиската неможност на семејствата за легализација влијаат врз собирањето на данокот. Ние како општина аплицираме за сите отворени проекти и фондови“, изјави Халими за 24 Вести.
Таа додава дека Арачиново е рурална општина и дека во минатото била запоставувана од претходните градоначалници и претходните влади.