Мишко Ралев е нов претседател на УО на Асоцијација на архитекти
Објавено во: Економија 22 Октомври, 2020
Ново раководство беше избрано на вчерашното изборно Собрание на Асоцијација на Архитекти на Македонија (ААМ). Собранието се одржа на отворено со почитување а препораките. За нов Претседател на Управниот Одбор на ААМ беше избран проф. д-р Мишко Ралев, Архитект и актуелен Декан на Факултетот за архитектура и дизајн при Универзитетот „Американ Колеџ“ во Скопје. За Претседател на Собранието на ААМ беше избрана Искра Јанковска Михајловска, Архитект од Скопје.
За Членови на Управниот Одбор на AAM се избрани архитектите - Александар Радевски, Иван Арсовски, Бесиан Мехмети, Јана Гугулоска-Ѓорѓевиќ, Марта Илиевска и Мартин Деловски.
Досегашниот Претседател на УО Мартин Пановски се заблагодарил за довербата од членството и потенцирал дека ја предава функцијата со голема чест и задоволство.
„Асоцијацијата на архитекти е здружение кое има суштинско значење, во секоја смисла на зборот и во својот домен на работа е директно поврзано со архитектурата и делата на архитектите. Оттука, како што всушност архитектурата меѓу другото значи и поврзување, релација со луѓето и општеството, ќе ни биде од суштинско значење во континуитетот со менаџирањето со ААМ. Или, отворени за јавноста за сè она што значи исполнување на простор во архитектонска смисла е премисата по која ќе одиме напред.
Имаме старо нов Управен одбор, од кој очекувам да продолжи интензивно и посветено да работи на унапредување на контактите и врските со јавноста, со политичкиот естаблишмент, со локалната самоуправа и со надлежните Институции во правец на отвореност за дебата, конструктивност и критики кои се неопходни во донесувањето точни одлуки кои се однесуваат на исполнување на просторот.“, истакна проф. д-р Мишко Ралев, новиот Претседател на У.О. на ААМ.