Младите Французи живеат во сиромаштија

Добивај вести на Viber

Во Франција 23 отсто од младите се сиромашни, стои во првиот извештај на Опсерваторијата на националниот институт за млади и народно образование (ИНЈЕП) за ситуацијата на младите во Франција, што ќе биде објавен утре.

Младите се првите жртви на рецесијата, но сите не се погодени на ист начин. Првите со дипломи, кои колку толку ги заштитуваат, вторите без дипломи и кои ги демне сиромаштијата.

Во Франција 15 отсто од младите немаат завршено училиште, занает или немаат работа, додека 22,5 отсто од младите на возраст од 18 до 24 години се погодени од сиромаштија.

Нивниот број за пет години се зголеми за пет проценти, односно над еден милион млади се соочуваат со ситуација на голема сиромаштија.

Според бројките од заводот за статистика на Франција- ИНСЕЕ, стапката на невработеноста во 2011 година кај генерацијата на возраст од 15 до 29 години изнесуваше девет проценти за оние кои поседуваа диплома за завршено високо образование, 22 отсто за оние со диплома за завршено средно образование и дури 46 отсто кај оние без диплома.

Стапката на сиромаштијата беше 30 отсто за младите без диплома, наспроти десет отсто за младите со завршено високо образование (прагот на сиромаштијата е под 964 евра месечно).

При вработувањето, дипломата стана релативна предност, многу повеќе отколку пред дваесет години и останува една од најдобрата заштита против невработеноста.

Дипломираните се тие кои успеваат најчесто да добијат вработување на неодредено време 80 отсто кај младите меѓу 25 и 30 години. Интересно е дека сите дипломи заштитуваат и помогаат при барањето на работа и против сиромаштијата.