Могерини ќе се смирува со Иванов

Високата претставничка за надворешни работи на Европската Унија, Федерика Могерини, утре ќе престојува во Скопје и ќе има средби со македонскиот државен врв, меѓу кои и со претседателот Ѓшрѓе Иванов, со кого минатата година имаше „славни дуели“ околу доделувањето .на манадатот за формирање на новата влада.

Могерини ќе има средби и со премиерот Зоран Заев и со лидерот на ВМРО-ДПМНЕ, Христијан Мицкоски. 

Минатата година во април Иванов откако ја избегна средбата со еврокомесарот за проширување Јоханес Хан, се очекуваше дека истото ќе го стори и со Могерини, но во последен момент во јавноста излезе информација дека ќе седнат на маса. Веднаш по средбата кабинетот на шефот на државата соопшти дека тој нема намера да му го даде мандатот на претседателот на СДСМ, Зоран Заев, да формира влада, бидејќи земјата е загрозена од т.н. Тиранска платформа. Могерини си замина со големо разочарување.

Претходно во март истата година таа го повика претседателот да ја повлече одлуката и да му го додели мандатот за состав на влада на Заев.

– Разговарав со Иванов и го замолив да ја преиспита и да ја повлече одлуката, и да го додели мандатот на оној кој обезбедил парламентарно мнозинство затоа што тоа стои запишано во вашиот Устав – рече Могерини и порача дека ЕУ очекува Македонија набрзо да се врати на патот на евроинтеграциите.

Нагласувајќи ја комплексноста на државата и ситуацијата, таа повика да се избегнува разгорување на меѓуетнички конфликти.

Инаку владината прес-служба соопшти дека Могерини и Заев денеска ќе ја посетат Турската чаршија.