„Мона Лиза на авганистанската војна“ - уапсена
Објавено во: Свет 26 Октомври, 2016
Aвганистанката со големи зелени очи, која стана позната ширум светот, откако списанието „Нешнл џиографик" ја објави во 1985 година на насловната страна, е уапсена во Пакистан за измама, пренесе ДПА, повикувајќи се на пакистански официјални претставници.
Шарбат Гулаш, чија слика, дело на фотографот Стив Макари, го доби прекарот „Мона Лиза на авганистанската војна", била приведена во нејзиниот дом во северозападниот пакистански град Пешавар. Гулаш е обвинета дека се обидела да добие пакистанско државјанство преку фалсификувани документи. Ако вината биде призната, таа може да биде осудена на седум години затвор.
Истрагата против Гулаш се води од Федералната истражна агенција на Пакистан - служба, која се занимава со случаите на измама. Директорот на агенцијата Имран Шахид изјави дека агенти извршиле претрес во домот на Гулаш и откриле во него и пакистански и авганистански документи за лична идентификација.
Семејството на Гулаш бега од Авганистан во Пакистан заедно со илјадниците авганистански семејства во времето на советската инвазија во 1979 година.