МВР немало за што да интервенира вчера во ИВЗ
Објавено во: Македонија 24 Април, 2019
И актуелното раководство на Исламската верска заедница и тоа што претендира да го превземе управувањето синоќа повикале полиција во седиштето, а од МВР соопштија дека немало никакви инциденти и немало потреба од интервенција.
Министерството за внатрешни работи ја информира јавноста дека по добиени две пријави и од едната и од другата страна, полициски службеници биле упатени во седиштето на Исламската верска заедница и на лице место не било констатирано нарушување на јавниот ред и мир.
- Министерството за внатрешни работи има обврска да го гарантира јавниот ред и мир, а внатрешните работи на Исламската верска заедница се работа на членовите на оваа верска заедница и најостро го отфрламе обидот на поединци и политички субјекти да го инволвираат МВР во овие случувања, велат од МВР.
Ријасетот на Исламската верска заедница кој му дава поддршка на реисот Сулејман Реџепи одржа вонредната седница во Факултетот за исламски науки во Кондово, по најавите за промена на поглаварот на ИВЗ врз основа на судско решение.
Реџепи истакна дека ИВЗ е скаран со Владата и дека од денеска јавноста ќе види дека има „поддршка од цел свет“.
Според судското решение што го добил, Скендер Бузаку од денеска треба да биде новиот поглавар на Исламската верска заедница. Тој синоќа го обвини Реџепи за „фамилијаризам“ во ИВЗ.
Останува да се види дали ситуацијата ќе доведе до ескалација на судири, иако до сега неколку пати имаше безуспешни обиди за превземање на врвот на ИВЗ.