МВР ПОМАГА ВО ГАСЕЊЕТО НА ПОЖАРИТЕ - само вчера ангажирани 650 полицајци
Објавено во: Македонија 09 Август, 2021
Полицијата е активно вклучена во гасење на пожарите кои беснеат во земјава, но и во контрола на веќе изгаснатите пожари. Само вчера дури 650 полицајци биле на терен.
„Во текот на изминатото деноноќие, во периодот од 07.00 часот на 08.08.2021 до 07.00 часот денеска (09.08.2021) во активностите за гаснење и превенирање на пожарите на територијата на Република Северна Македонија, од страна на МВР беа ангажирани околу 650 полициски службеници, реализирани 222 мото-патроли, при што беа користени 205 возила. Деноноќно на терен се и припадниците на сите специјлни единици на полицијата: Специјалната антитерористичка единица „Тигар“, Единицата за брзо распоредување и Посебната единица за поддршка, кои несебично помагаат во гасење на пожарите“, велат од МВР.
МВР апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не се фрлаат неизгаснати догорчиња и да не оставаат стаклени шишиња или други предмети, кои подолго време изложени на сонце, можат да предизвикаат пожар. Неопходна е максимална будност и целосно одговорно однесување на секој поединец, потенцираат од полицијата.