На северот од Косово уапсени 13 лица, тревога во Србија
Објавено во: Балкан 28 Мај, 2019
Утринава специјалните сили на косовската полиција упаднале во четирите општини на северот на Косово со мнозинско српско население и уапсиле 13 етнички Срби, меѓу кои и полицајци, јави Танјуг повикувајќи се на свои извори.
Од косовската полиција тврдат дека апсењето е по налог на Општинскиот суд во Приштина и дека станува збор за неколку полицајци и граѓани осомничени за криминално здружување и дека акцијата е резултат на неколку месечна истрагата на Косовското специјално обвинителство.
„Станува збор за нелегалната трговија со стоки, за злоупотреба на функцијата, мито и недозволена трговија", се вели во соопштението на косовската инспекција.
Во соопштението се вели дека "и покрај вооружен отпор во северниот дел на Митровица полициска операција продолжува, вклучувајќи го и апсењето и контрола на неколку локации кои резултираа со запленување на релевантни докази, вклучувајќи и оружје со долги цевки"
Директорот на српската Канцеларија за Косово и Метохија, Марко Ѓуриќ утрово изјави за РТС, дека косовски специјалци напаѓаат Срби на влез во Зубин Поток во обид да влезат во тоа населено место. Тој додаде дека косовските специјалци со оружје упаднале утрово во сите четири општини на север во Косово. Според него, апсењата се извршени „поради некаква вмешаност на тие лица во организиран криминал“.