Над 150 илјади евра вложени во акциите на ЗК Пелагонија
Објавено во: Финансии 03 Април, 2018
Во само една голема блок трансакција преку Македонска берза откупена е прилично голема количина на акции од агрокомбинатот ЗК Пелагонија АД Битола со вкупна вредност од 9,5 милиони денари или нешто над 150 илјади евра.
Во оваа блок трансакција една акција на ЗК Пелагонија е платена по цена од 2.726 денари, а продадени се вкупно 3.500 акции.
Според моменталните финансиски показатели вредноста на акциите на ЗК Пелагонија изнесува 2.810 денари, со запишана книговодствена вредност од 15.073 денари.
Оваа трансакција доаѓа непосредно по објавата на годишните финансиски извештаи според кои ЗК Пелагонија во 2017 година остварила двојно повисоки оперативни приходи и добивка поголема за речиси сто илјади евра во однос на годината претходно.
Сепак, и натаму нема информации дали годинава ЗК Пелагонија за прв пат по подолго време ќе подели дивиденда од чистата добивка од лани или ќе ја чува во резерви за други намени.