Најпрофитабилен сектор, а вработеноста се намалува
Објавено во: Финансии 03 Мај, 2018
Иако банкарскиот сектор важи за највисокопрофитабилен во Македонија, во 2017 година, бројот на лица вработени во банкарскиот систем се намалува. Бројот на вработени во однос на година претходно е 56 помалку и изнесува 5.929, покажуваат најновите податоци на Народната банка. Најголемо намалување на вработените има кај една средна банка (за 53 лица) и една мала банка (за 21 лице).
Од друга страна, позабележителен пораст на вработените има кај една голема банка (за 38 лица). Учеството на вработените со минимум високо образование и натаму се зголемува, достигнувајќи 78,8%, односно зголемување од 2,1 процентен поен, што укажува на понатамошно подобрување во квалификациската структура на вработените во банкарскиот сектор.
„Продуктивноста на банкарскиот систем и натаму се подобрува. Во текот на 2017 година, активата растеше, но забавено во однос на
претходната година, додека, пак, видлива е негативна промена на бројот на вработените лица.
Анализирано по поединечна банка, мерено преку износот на активата по вработен, продуктивноста е подобрена кај дванаесет банки, при што
кај седум од нив тоа е резултат на раст на активата при истовремено намалување на бројот на вработените, кај четири од нив, тоа е резултат
на побрзиот раст на активата од растот на вработените, а кај една банка, зголемениот износ на активата по вработен произлегува од побрзиот
пад на бројот на вработени во споредба со падот на износот на активата“, соопшти НБРМ.