Народна банка контра ММФ и Светска банка

Добивај вести на Viber

Советот на Народната банка на Република Македонија денес на разгледување најновиот Квартален извештај и ревизијата на  макроекономските проекции до крајот на 2019 ги задржа оценките за растот на бруто домашниот производ (БДП) во 2018 и 2019 година до 3,2% и 3,5%, соодветно, а забележана е одредена промена во структурата на придонесите во растот. Анализата на НБ не соодветствува со проекциите на ММФ и Светска банка дека Македонија во 2018 нема да го оствари планираниот економски раст од 3,2%.

„Оваа констатација се надоврзува на задржаните здрави економски основи, отсуството на нерамнотежи и релативно поволната надворешна позиција, при забавен годишен раст на домашните цени од 1,5% во првиот квартал на 2018 година, поради што Народната банка ја олабави основната каматна стапка намалувајќи ја од 3,25% на 3,00%. Воедно, на денешната седница на Советот беше утврдено и понатамошно стабилизирање на очекувањата на економските субјекти, што е видливо преку поволните движења на девизниот пазар, забрзаниот депозитен раст и растот на кредитната активност. Во првото тримесечје на 2018 година, Народната банка интервенира на девизниот пазар со откуп на девизи, девизната позиција на банките се одржуваше на солидно ниво, а девизните резерви остварија раст и се задржаа во сигурната зона. И во текот на целиот период на проекциите, 2018 и 2019 година, показателите за адекватноста на девизните резерви се одржуваат во сигурната зона“, гласи во соопштението на централната банка.

Најголема промена во споредба со октомврискиот циклус е зголемениот позитивен придонес на домашната побарувачка. При силен раст на платите, зголемување на вработеноста, како и стабилните очекувања, се очекува дека личната потрошувачка ќе има зголемено влијание врз растот. Извозот и натаму ќе биде главен фактор со најголем позитивен придонес кон растот. Се очекува умерен дефицит на тековната сметка од 1,5% од БДП во 2018 и 2019 година, што е малку пониско ниво во однос на октомвриската проекција, при тренд на стеснување на салдото на стоки и услуги. Малку повисоки од октомвриските се и очекувањата за приливите во финансиската сметка во текот на 2018 и 2019 година, коишто изнесуваат 5% од БДП, во просек.

Општо земено, проекциите упатуваат на потенцијал за солиден раст на домашната економија, поддржан и од кредитната активност на банките, отсуство на инфлациски притисоци, како и задржување на поволната надворешна позиција. 

Народната банка и натаму внимателно ќе ги следи движењата, заради навремено и соодветно приспособување на монетарната политика кон промените во домашниот и надворешниот амбиент.

 Советот разгледа и други прашања од својата надлежност.