НБРМ ја намали проекцијата, колкав раст ќе има економијата?
Објавено во: Економија 25 Мај, 2017
Народна банка на Република Македонија ја намали проекцијата за економски раст во земјата.
Наспроти октомвриската проекција на пораст на домашниот бруто-производ (БДП) за 2017 година од 3,5%, во априлската проекција на Народна банка, порастот на БДП е намален на 2,5%.
Според објаснувањето од НБРМ, оваа корекција е направена поради политичката криза, која што продолжи и на почетокот на 2017 година, иако при октомвриската прогноза се сметаше дека таа брзо ќе заврши.
„До крајот на годината очекуваме постепено разрешување на кризата, стабилизирање на амбиентот и исцрпување на неповолните ефекти“ – изјави гувернерот на НБРМ, Димитар Богов.
Тој вели дека последните три години иако имавме политичка влада, немавме политичка стабилност.
Главни фактори кои ќе влијаат на економскиот пораст во 2017 година ќе бидат извозот и личната потрошувачка, како и продолжување на циклусот на јавните капитални инвестиции и пораст на странските директни инвестиции.
НБРМ има непроменети очекувања за нивото на инфлацијата споредено со октомври и очекува забрзување на растот на цените, односно инфлација од 1,3% годинава и 2% во 2018 година.