НЕ Е ИВАНКА ТРАМП: Еве кој е можен кандидат за челната позиција на Светска банка
Објавено во: Економија 16 Јануари, 2019
Вашингтон ја разгледува опцијата да ја кандидира поранешната генерална директорка на компанијата Pepsiko (PepsiCo), Индра Ноји, за иден шеф на Светска банка.
Според пишувањата на Њујорк тајмс, Индра Ноји се спомнува како кандидат, откако минатата недела се демантирани шпекулациите на Бизнис инсајдер дека за таа функција ќе биде номинирана Иванка Трамп.
Повикувајќи се на неколку луѓе запознаени со случувањата, њујоршкиот весник пишува дека Индра ја препорачала токму ќерката на претседателот на САД Доналд Трамп, Иванка, која била вклучена во интерната потрага на админстрацијата во Вашингтон за кандидати, пренесе CNBC.
Во текстот, меѓутоа, се додава дека процесот на избор на кандидат кој ќе го наследи Џин Јонг Ким кој даде оставка, е во тек и уште во почетна фаза.
Белата куќа засега не одговори на барањето на CNBC за коментар.
Индра Ноји во октомври лани се повлече од местото на главен извршен директор на PepsiCo кој под нејзина палка работеше 12 години.