Нимиц: Не дадов никакви предлози, но се обидувам да ги олеснувам разговорите
Објавено во: Македонија 12 Декември, 2017
Медијаторот во разговорите за името меѓу Македонија и Грција, Метју Нимиц по денешните разговори во Брисел со преставниците, Васко Наумовски и Адемантиос Василакис изјави дека и во Скопје и во Атина постојат индикации дека би требало да се направат интензивни напори за да се реши ова прашање.
Toj вели дека имале двочасовни разговори околу прашањето за името.
„Ова доаѓа по три години и атмосферата е многу подобра. Првиот состанок беше да ги поставиме уште еднаш позициите на страните. Јас не дадов никакви предлози, но се обидувам да ги олеснувам разговорите меѓу двете страни. Двете страни се добро подготвени и ги артикулираа нивните позиции. Тие покажаа добра воља да ја слушнат другата страна и да ги разберат нивните позиции и да размислат за можните решенија со кои ќе се реши прашањето“- вели тој.
Нимиц во изјавата додаде дека ќе има обиди за средби секој месец, во јануари, февруари, март, со цел да има напредок во процесот.
Нимиц се надева дека тоа ќе доведе до решение на спорот.
Претходно од Приштина премиерот Зоран Заев, кој одговарајќи на новинарско прашање, рече дека Македонија и Грција не се стигнати дотаму да разговараат за некои нови имиња и додаде дека деновиве ќе се разговара за потврда на желбата на двете страни суштествено да навлезат во решавање на проблемот.