ДВА МИЛИОНИ ЕВРА ЗА ДОКАПИТАЛИЗАЦИЈА: Издадена нова емисија од Капитал банка
Објавено во: Финансии 13 Јануари, 2022
Капитал банка АД Скопје ја зголеми основната главнина на друштвото со издавање на 11.254 обични акции по пат на приватна понуда во петта емисија. Централниот депозитар за хартии од вредност објави дека вчера е извршен упис на акциите.
Со новата емисија основната главнина на Капитал банка Скопје изнесува 7.107.689 евра.
Инаку во емисијата, издадени се вкупно 39.996 обични акции со номинална вредност од 177,71 евра за една акција.
Претседателот на Управниот одбор на Капитал Банка, Цветан Петринин во интервју за Фактор во декември зборуваше за докапитализацијата. Прво беше извршена докапитализација со зголемување на основната главнина за три милиони евра, а на почетокот на годината за уште два милиони евра.
„Новите докапитализации од вкупно пет милиони евра се клучни за развојот на банката, кој неминовно и паралено мора да биде проследен со соодветен раст на капиталот. Само со нивна усогласена кохезија може да се планира и предвиди остварување на долгорочните цели. Имајќи ги предвид стратешките цели, Капитал Банка е во процес на зацврстување на капиталната структура, со цел таа да биде ставена во функција на остварување на планираниот раст и долгорочните деловни цели, и главната цел во блиска иднина - проширување на лиценцата за извршување на банкарски активности и работа со странство, односно соработка со странски правни лица, што всушност е индината на интеграцијата на државата во европските пазари, изјави Петринин.
Зајакнувањето на капиталната позиција на банката делува превентивно врз потенцијалните ризици, и ќе доведе до зголемена безбедност за штедачите, раст на кредитирањето, а ќе ја зголеми и профитабилноста на Капитал банка.