Нови крајни рокови за „двојазичноста“
Објавено во: Македонија 11 Декември, 2017
Албанските партии кои партиципираат во Владата постојано ги поместуваа роковите за носење на новиот закон за употреба на јазиците, а дел од нив дури и се закануваа дека ќе излезат од владината коалиција доколку не се постигне предвидената динамика. Сепак, собраниската процедури претрпе повеќе прекини и за ултиматуми веќе никој не говори така силно, но според пратеникот на ДУИ Артан Груби од јануари следната година законот ќе биде усвоен и ќе започне да се применува „двојазичноста“.
Во Собранието на Република Македонија денеска седница треба да одржи Комисијата за европски прашања, на која на дневен ред е Предлог-законот за употреба на јазиците во второ читање.
На разгледување треба да бидат околу стотина амандмани кои беа предложени како од опозициските ВМРО-ДПМНЕ кои и најмногу се противат на овој закон обвинувајќи дека ќе се воведе двојазичност на целата територија на државата што е спротивно на Уставот и од БЕСА кои пак, се незадоволни што со предлог законот не се врши доволно за прогласување на албанскиот за службен јазик во целосна рамноправност со македонскиот, како и од СДСМ.
Комисијата ќе ги разгледува поднесените амандмани по предложениот текст. Потоа законот во второ читање ќе оди повторно на пленарна седница на дебата по што ќе следува финално изјаснување на пратениците по текстот.
Потребата од носење закон за употреба на јазиците беше изгласана од пратениците на 15 ноември годинава. „За“ гласаа 66 пратеници, а 41 беа против.
Дел до законот кој е и најспорен и се однесува на двојазични униформи, двојазични пари и други елементи е на оценка кај Венецијанската комисија при Советот на Европа и откако ќе биде доставено мислењето амандмански и овие одредби може да се вратат во предлог законското решение, покрај одредбите за употреба на албанскиот јазик како службен доколку тоа биде побарано во сите институции на државната власт..