Од кабинетот на Анѓушев велат дека ВМРО-ДПМНЕ изнесе лаги за продажбата на EDS

Добивај вести на Viber

Од кабинетот на вицепремиерот Кочо Анѓушев, во врска со прес - конференцијата на портпаролот на ВМРО-ДПМНЕ, Димче Арсовски одржана денеска, велат дека се изнесени низа на невистини и шпекулации поврзани со заменикот претседател на Владата задолжен за економски прашања, д-р Кочо Анѓушев, за продажбата на компанијата Energy Delivery Solution (EDS). 

„Вицепремиерот Анѓушев, почитувајќи го јавниот интерес, потполно транспарентно изврши продажба на приватна компанија, изградена од нула, која успешно функционира со години во 9 земји и притоа јавноста беше информирана и за прецизниот износ за кој компанијата е продадена. Воедно, би сакале повторно да ја информираме јавноста и да го потсетиме ВМРО-ДПМНЕ дека пред да биде извршена продажбата на компанијата три реномирани меѓународни ревизорски куќи (Ernst & Young,  Baker Tilly, Grant Thornton), извршија ревизија на работата на компанијата, по што беше формирана цената за продажба. Сите коментари за продажба на EDS, што се врзуваат во политички контекст се апсолутно неосновани и неточни. Крајно несериозно е ВМРО-ДПМНЕ, која се смета за сериозна партија, да се повикува на непотврдени и неофицијални информации од извори, кои притоа и не ги именува, истите да ги претставува како факти и со таква леснотија да изнесува невистини и шпекулации пришто е очигледен обидот да се наруши личниот углед на вицепремиерот, но и на компанијата“- велат од кабинетот на Анѓушев. 

Поради изнесените лаги и обидот за нарушување на угледот на вицепремиерот, ќе бидат преземени сите правни механизми, вклучувајќи и евентуална судска заштита, во насока на зачувување на личноста и интегритетот на потпретседателот на Владата.