Од Република Српска и Србија стигнаа реакции по пресудата за Караџиќ
Објавено во: Балкан 20 Март, 2019
Откако беше објавено дека првиот претседател на Република Српска, Радован Караџиќ е осуден во Хаг на доживотен затвор, политичарите од Република Српска се јавија со реакции.
Претседавачот со Претседателството на БиХ Милорад Додик денеска изјави дека пресудата за првиот претседател на Република Српска Радован Караџиќ е прилично арогантна и цинична и е дел од порамнување на сметките меѓу претходните пресуди на Хашкиот суд.
Претседателката на Република Српска, Жељка Цвијановиќ изјави дека пресудата за првиот претседател на РС Радован Караџиќ, нема, ниту може да има политички последици за РС.
Таа изјави дека се утврдува само индивидуална вина и дека во никој случај не се однесува на цела РС, ниту за нејзината иднина.
„Но, постои тој горчлив вкус и оправдана недоверба која постоеше и претходно кон судењата на Хашкиот трибунал“, рече Цвијановиќ и додаде дека тоа не придонело за подобри односи во БиХ.
Таа додаде дека „имајќи ги предвид претходните пресуди на Хашкиот трибунал, можела да се очекува и денешната за Караџиќ“.
Поединци, претставници на разни организации и политички партии од Србија реагираа на пресудата со која Радован Караџиќ е осуден на доживотна казна затвор.
Босанската новинска агенција Фена пренесува дека поранешниот српски обвинител за воени злосторства Владимир Вукчевиќ изјави дека доживотната пресуда за Караџиќ е поправедна од претходната.
„Јас како професионалец не очекувам казната да биде помала или поголема, туку праведна“, рече Вукчевиќ.
Белградскиот адвокат Тома Фила изјави дека пресудата за Караџиќ е лоша за него, но оти со неа „барем е отстранета идејата за Србите како геноциден народ“.
Основачката на Фондот за хуманитарно право Наташа Кандиќ оцени дека пресудата е очекувана и оти би требало да помогне во тоа таквите работи од минатото никогаш повеќе да не се повторат.
Поранешниот претседател на Република Српска, Радован Караџиќ, е прогласен за виновен за геноцид, злосторства против човештвото и воени злосторства, изјави главниот обвинител Серж Брамерц.