Одземен мобилниот телефон на обезбедувачот кој лажно пријави дека има бомба во Сити мол
Објавено во: Македонија 01 Февруари, 2020
Одделението за насилен криминал до Јавното Обвинителство поднесе кривичнa пријавa против П.Ц.(20) поради лажното пријавување за бомба во Сити мол, по што скопскиот шопинг-центар мораше да биде евакуиран од страна на полицијата.
„Пријавениот, вработен како обезбедување во Трговскиот центар „Сити Мол“ преку агенција за обезбедување, на 29.01.2020 во 11.53 часот, додека бил на работа, со намера да се пошегува со својот претпоставен, од својот мобилен телефон му испратил порака „напуштете го молот веднаш, има бомба!“. Веднаш потоа, неговиот претпоставен пријавил во полиција и била организирана евакуација на трговскиот центар, а екипа од Одделот за антитероризам при МВР извршила пребарување и проверка на целиот објект, при што било утврдено дека во објектот нема поставено експлозивна направа, односно дека станува збор за лажна дојава“, се вели во соопштението на МВР.
Истиот ден, во просториите на Полициската станица Кисела Вода, полициски службеници извршиле разговор со пријавениот и од него бил одземен мобилниот телефон како доказ.
Од страна на судија на претходна постапка на пријавениот му се одредени мерки на претпазливост: забрана за напуштање на живеалиштето, обврска да се јавува повремено на определено службено лице кај надлежен државен орган, привремено одземање на патна исправа и забрана за преземање на определени работни активности кои се поврзани со кривичното дело.