Општина Тетово побара финансиска помош од Владата
Објавено во: Економија 06 Април, 2020
Општина Тетово, по завршувањето на седницата на Кризниот штаб, побара од Владата финансиска помош за јавните претпријатија и службите на локалната самоуправа во борбата со епидемијата Ковид-19.
„Бараме владата да ја разгледа можноста за усвојување на мерка за финансиска помош на јавните претпријатија основани од општината, а посебно за јавното комунално претпријатие кое во овој период има зголемен обем на работа, а намален број на приходи и да се обезбедат дополнителни средства за противпожарната единица од општина Тетово, заради фактот дека токму овие единици се максимално ангажирани на терен со дезинфицирање, чистење на градските улици, како и други активности кои произлегуваат околу справувањето со настанатата ситуација со ширење на COVID19“, гласи во еден од заклучоците на општината.
Од тестовите направени од Институтот за јавно здравје идентификуван е е случај на инфекција со COVID19, со која вкупниот број заразени досега се искачи на 30 лица.
„Со жалење ве информираме дека денес починале двајца граѓани од општина Тетово кои претходно биле заразени со КОВИД19, со што бројката на починати лица од нашата општина се искачи на 3 лица кои претходно биле заразени со Ковид 19“, додаваат од општината која е раководена од градоначалничката Теута Арифи.
Побарано е и од Народната банка да преземе конкретни мерки за банките во Тетово да го прилагодат работното време на оваа вонредна состојба и да најдат модус за исплаќање пензиите преку пошта, така што старите лица ќе нема потреба да се собираат и групираат пред банкоматите и влезовите на банките.