Панчевски: Претресот беше брутален
Објавено во: Македонија 07 Октомври, 2017
Екс претседателот на Кривичниот суд Владимир Панчевски обвини дека вчерашниот претрес бил брутален и врз него била применета физичка сила. Испрати порака и до Јанева и до судиите дека ги охрабрува да работат согласно законот, но смета дека ваквата постапка е направена за да создаде страв.
„Незнаењето на Катица Јанева продолжува. Со ова се постигнати две цели претпоставувам., за изборните резултати за СДСМ и сеење страв во македонското правосудство. Јанева нема да ме заплаши , имам чиста совест. А вчера без да ми бидат посочени правата и без присуство на бранител беше применета сила од припадник на МВР“, посочи судијата Панчевски во телефонски разговор за ТВ 24.
Материјалните докази кои СЈО ги собра веќе се предмет на анализа. Треба да се утврди дали системот АКМИС за електронска распределба на предмети кај судии е злоупотребен и дали Панчевски како поранешен претседател на Кривичниот суд рачно местел случаи кај одредени судии.
Вештачењата треба да ги утврдат и сомневањата на кого и што како тајни информации давал Панчевски. Катица Јанева засега не потврдува дали Ѓорге Иванов е лицето кое од Панчевски ги добило идентитетите на осомничените пред да го објави списокот со политичари, нивни соработници, но и заштитени сведоци кога донесе одлука за нивна аболиција.