Партиите се скараа кој со чии инвестиции се слика и фали
Објавено во: Економија 03 Февруари, 2019
Откако премиерот Зоран Заев вчера беше во посета на компанијата „Костал Македонија ДООЕЛ Охрид“, од ВМРО-ДПМНЕ велат дека токму минатата власт ја донела оваа компанија да инвестира во Македонија.
Велат дека тоа е израз на неспособноста и некадарноста на Владата.
„Во недостаток на сопствени инвестиции кои што би обезбедиле нови работни места за граѓаните, аболицираниот Зоран Заев се слика и се фали со странските инвестиции кои што ги донесе ВМРО-ДПМНЕ. Да биде лицемерието поголемо токму странските инвестиции по кои што СДСМ и Заев фрлаа со дрва и камења кога беа во опозиција, сега им се единствена светла економска точка. Компаниите кои за СДСМ беа симбол за експлоатација на работници и ниски примања, сега за нив се компании кои поттикнуваат економски развој. Германската компанија „Костал Македонија ДООЕЛ Охрид“ е уште една од многуте странски инвестиции кои ги донесе ВМРО-ДПМНЕ. Нејзиното работење е само уште еден доказ за успешните економските политики кои ги имплементираше владата предводена од ВМРО-ДПМНЕ и кои резултираа со илјадници нови работни места“, стои во реакцијата.
Од партијата тврдат дека граѓаните од оваа власт не виделе никаков бенефит. Обвинија дека СДСМ единствено што успеаја досега да направат е да ги зголемат бизнисите на своите функционери, на сметка на граѓаните кои се повеќе осиромашуваат.
Велат дека СДСМ нема капацитет да донесе инвестиции во Македонија.
Заев заедно со министерот за транспорт и врски, Горан Сугарески и со в.д. градоначалникот на општина Охрид, Константин Георгиевски, вчера беа во посета на германската компанија каде нето платата е скоро 500 евра.