Пендаровски го помилувал Фета за добро однесување
Објавено во: Македонија 18 Март, 2022
Претседателот Стево Пендаровски вели дека групните помилувања ги дава кога Министерството за правда доставува список на предлози добиени од казнено-поправните домови. Ова следува откако на неговиот последен список се најде Абдулфета Алими
Шефот на државата тврди дека Фета, осуден на шест години затвор како обезбедување во Собранието кога се случија настаните на 27 април 2017, е само делумно помилуван од осум месеци, а обично таков акт се носи во случаи кога граѓаните кои бараат помилување имаат за отслужување уште неколку години од казната
„Основните предуслови за едно лице да биде помилувано, се во насока на добро поведение, да покажал каење за стореното дело, да почне со отслужување на казната, да не станува збор за повторник или лице кое има повеќе дела за кои треба да одговара и во иднина. Потенцираме дека за одредени кривични дела не е возможно да се бара помилување. Секој случај се разгледува поединечно. Во однос на предметите опфатени со последната одлука за помилување на осудени лица, Комисијата за помилување даде позитивен предлог.
Лицето Абдуљфета Алими, кој има добиено делумно ослободување од понатамошно извршување на неиздржаниот дел од казната затвор, во траење од осум месеци, ги има исполнето условите предвидени со Законот за помилување и воспоставената пракса“, се вели во коментарот од кабинетот на Пендаровски.
За случајот со целосното помилување на Александар Петровски вели дека тоа е затоа што тој е во животнозагрозувачка здравствена состојба. Од кабинетот тврдат дека тој не учествувал во странски војски.
„Александар Петровски, потполно се ослободува од понатамошно извршување на казната затвор, бидејќи станува збор за граѓанин со тешка и животнозагрозувачка здравствена состојба. Не станува збор за повратник од странски боишта.
Помилувањето е институт кој има корективна функција. Дејствата кои ги предизвикува помилувањето се овозможување и забрзување на ресоцијализацијата на осудените лица а со тоа и остварувањето на целите на казнувањето и извршувањето на казната“, се вели во објаснувањето.