Петков тврди дека Брисел ќе биде гарант за внесување на Бугарите во македонскиот Устав
Објавено во: Македонија 21 Февруари, 2022
Бугарските власти не се откажуваат од барањето за внесување на Бугарите во Уставот.
Премиерот на Бугарија, Кирил Петков вели дека со македонската влада предводена од премиерот Димитар Ковачевски ќе достават заеднички предлог до Европската комисијата, Брисел да биде гарант дека Бугарите ќе влезат во македонскиот Устав во текот на пристапните преговори со ЕУ. Тој во интервју за „Еурактив“ изјави дека тоа не е билатерално прашање, туку е во согласност со принципите на сите земји членки на ЕУ.
„Мислам дека сега имаме разбирање со новата влада дека во Уставот треба да биде вклучено дека секој Бугарин во Северна Македонија може да се чувствува рамноправен со другите Македонци со поинакво потекло. Оваа еднаквост и антидискриминација се согласивме дека треба да се направи и сега треба да го најдеме вистинскиот механизам за да се осигураме дека ќе се случи. Во овој поглед, разговараме со нашите пријатели од Брисел да бидат гаранција за ова како дел од пристапните преговори. Не е дека едната земја притиска, а другата вели не, туку сега планираме да излеземе пред Европската комисија со заеднички предлог, на принципите на Копенхашките критериуми, на принципите на законска заштита на луѓето со поинакво потекло“, кажа Петков.
Според него, ова може да биде пример за другите земји од регионот. Бугарскиот премиер додаде и дека со македонската влада се согласиле дека треба да се справат со последиците од некаква си антибугарска кампања во времето на Тито. Ова е став кој за кој говореле и други бугарски политичари.
Лидерот на ВМРО-ДПМНЕ, Христијан Мицкоски вели дека и ние бараме од Брисел да биде гарант за македонскиот јазик и за македонскиот народ.
Македонија не може да ги почне преговорите со ЕУ додека не се тргне бугарското вето.
Но, бугарските власти ги игнорираат барањата на Македонците во Бугарија за кои долго време говори ОМО Илинден Пирин.