Петковиќ тврди дека Бојан Мијаиловиќ е убиен „лице в лице“ додека лежел повреден во Бањска

Добивај вести на Viber

Белград инсистира дека тројцата Срби во Бањска се брутално убиени.

Бојан Мијаиловиќ е убиен „лице в лице“ додека лежел повреден во настаните во Бањска, обвини Петар Петковиќ, проректорот на канцеларијата за Косово и Метохија на Србија. Петковиќ објави фотографија од телото на Мијаиловиќ велејќи дека сите тројца Срби се брутално убиени, пренесува Б92.

Петковиќ информираше дека според она што можеле српските вештаци да го анализираат од фотографијата, влезната рана на Мијаиловиќ била во пределот на левиот очен капак, а излезната рана на десната страна на главата.

Петковиќ рече дека е испратено и второ писмо до ЕУЛЕКС во кое Србија бара ЕУЛЕКС да одговори зошто бил одбиен да присуствува на обдукцијата на телата. Кажа дека обдукцијата и наодите се клучни за да се докаже дека Србите се брутално убиени.

„ЕУЛЕКС соопшти дека обдукцијата била извршена на 26 септември, а во изводот на смртта што го добиле семејството пишува дека е извршена на 25 септември“, посочи Петковиќ велејќи дека Србија претходно открила дека целиот процес бил „обвиен во тајност“.

Петковиќ изјави и дека косовскиот премиер Албин Курти „продолжува со својот терор“, потсетувајќи дека уште еден Србин е уапсен додека одел на погребот на еден од тројцата убиени Срби.

Припадниците на специјалната единица на косовската полиција се повлекуваат од селото Бањска кај Звечане и ќе бидат заменети со припадници на интервентна единица, јави косовскиот портал на српски јазик КоССев.