ПЛАТИТЕ СО БЛАГО НАМАЛУВАЊЕ ВО СПОРЕДБА СО ПРЕТХОДНИОТ МЕСЕЦ, ДЗС ја пресмета просечната нето плата за мај
Објавено во: Финансии 22 Јули, 2022
Просечната нето плата во месец мај изнесува 31.407 денари, објави Државниот завод за статистика. Во споредба со истиот месец минатата година имаме раст на нето платата во земјава, но во споредба со претходиот месец годинава има благо намалување на платата.
Како што се наведува на веб страната на ДЗС, индексот на просечната месечна исплатена нето-плата по вработен во мај 2022 година, во однос на мај 2021 година, изнесува 109.4.
- Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Објекти за сместување и сервисни дејности со храна (19,7 отсто), Уметност, забава и рекреација (16,1 проценти) и Преработувачка индустрија (14,3 отсто). Намалување на просечната месечна исплатена нето-плата по вработен, во однос на претходниот месец, е забележано во секторите: Дејности на здравствена и социјална заштита (10,8 проценти), Трговија на големо и трговија на мало; поправка на моторни возила и мотоцикли (2,1 отсто) и Административни и помошни услужни дејности (1,4 проценти) - објави ДЗС.
Претходниот месец, ДЗС пресмета дека просечната платаво месец април изнесувала 31.525 денари.