По БИХ и Бугарија, Газпром купува бензински станици и во Романија

Компанијата "Нафтена индустрија Србије" (НИС), чиј мнозински сопственик е руски Газпром, е на чекор од купување на 60 бензински пумпи во Романија од „OMV  Петром“, пишува денеска весникот "Адеварул". Со ова Газпром прави мал, но важен чекор за влез на романскиот пазар, посочува весникот.На крајот на минатата недела НИС го објави купувањето на 28 бензински станици на OMV во Босна и Херцеговина, а пред неколку месеци најави дека има намера да купи 40 бензински пумпи во Романија до крајот на годинава и уште 120 до крајот на 2014 година. Есента оваа година српската филијала на Газпром купи три бензински пумпи на Евроил, сопственост на романски бизнисмени. Сега е на пат да купи речиси 60 на Петром, пишува весникот. Во натписот стои и дека со 63 бензински пумпи во Романија, Газпром ќе стане еден од големите синџири,  по Петром (550 бензински пумпи во моментов), Ромпетрол (450), Лукоил (300) и МОЛ (133). На локалниот пазар НИС ќе надмине мрежата бензински пумпи Аджип со 37 станици. Ова лето српската единица на Газпром-НИС Петрол купи уште пет бензински пумпи во Бугарија, со што го зголеми својот удел до 0.6% од бугарскиот пазар.