По девет години деблокирани сите сметки и исплатени долговите на Општина Куманово
Објавено во: Македонија 27 Октомври, 2020
Градоначалникот на Куманово, Максим Димитриевски, денеска на тригодишнината од своето стапување на функцијата, рече дека по девет години деблокирани се сите сметки и исплатени сите долгови на општината.
- Со гордост можам да кажам дека од март 2020 година сметките на Општина Куманово конечно се консолидирани и деблокирани. Општина Куманово беше под целосна финансиска блокада од 2012 година, па се до март 2020, кога беа исплатени сите долгови на општината, истакна Димитриевски.
Тој надополни дека исплатени се 470 милиони денари за долгови на општината во вид на затечени обврски, затечени обврски на основните и средните училишта, судски извршни решенија и друг тип на задолженија.
- Ваквиот финансиски резултат се должи на транспарентното работење во општината, транспарентите процеси и заштеди од јавни набавки, зголемени даночни и други приходи особено, данок на промет на имот, но и од големо значење и еднократната помош од Владата и централното ниво на власт, во висина од 115 милиони денари. На сопствена сметка општина Куманово има 17 милиони денари со кои располагаме – додаде првиот човек на Општина Куманово.