Добивај вести на Viber
Демократскиот сојуз го поддржува барањето на Сојузот на синдикатите на Македонија за зголемување на минималната плата на 18.000 денари и ја охрабрува Владата што побрзо да донесе измени на Законот за минимална плата.
Од Демократскиот сојуз истакнуваат и дека за нив отсекогаш врвен приоритет е подобрувањето на стандардот на граѓаните, како основен предуслов за раздвижување на сите позитивни процеси во државата, посебно на економскиот развој и зголемувањето на продуктивноста. Ниските плати не ги мотивираат вработените, негативно влијаат на продуктивноста, иновациите, поради што и младите и креативни кадри заминуваат во странство.
„ССМ укажува дека работниците добиваат се поголема и повеќе од потребна поддршка во Собранието, а се со цел унапредување на работнички права и остварување на правото на достоинствена плата со зголемување на минималната плата со кое спирално ќе се зголемат останатите плати“, се вели во соопштението од Синдикатот.
ССМ го поздравува пристапот на отворена поддршка со која и Демократскиот сојуз ќе го предложи до Собранието предлог законот на ССМ поднесен во декември за зголемување на минималната плата и дека работниците ќе го ценат придонесот на пратениците кои им подаваат рака кога им е најтешко.
„ССМ уште еднаш укажува дека во услови кога ниту најголемиот пораст на минималната плата во 2017 година не го загрозил стопанството – односно фирмите не отпуштале работници, не ги намалувале платите, ниту пак им се намалил профитот- туку напротив ја зголемиле продуктивноста и профитот, очекуваме и другите партии и пратеници во парламентот да го следат примерот и да го сторат истото веднаш и да покажат дека се за работниците и за граѓаните“, се вели во соопштението од ССМ.