ПО ЕВРО ЗА КВАДРАТ: Се продава земјиште за стопански објекти во Кривогаштани

Добивај вести на Viber

По почетна цена од 61 денар за метар квадратен, Министерството за транспорт и врски распиша оглас за продажба на државно градежно неизградено земјиште во општина Кривогаштани, чија намена е изградба на стопански објекти. Станува збор за осум парцели во Кривогаштани, со површина од 1497 до 3664 метри квадратни, на кои е предвидена изградба на Г2, Г3, Г4 – лесна и незагадувачка индустрија, сервиси (мало стопанство) или стоваришта (магацини), со компатибилни класи на намена Б1 до 30%. Пријавите за учество на јавното наддавање може да се достават најдоцна до 04.12.2014 година, а електронската аукција ќе се изврши на 11.12.2014 година на интернет-страницата www.gradezno-zemjiste.mk „Право на учество во јавните наддавања имаат физички лица (државјани на Република Македонија, државјани на држави членки на Европската унија и на ОЕЦД, како и државјани на држави кои не се членки на Европската унија и на ОЕЦД, а под услови на реципроцитет можат да стекнат право на сопственост на градежно земјиште на територијата на Република Македонија) и правни лица (домашно правно лице, правно лице во мешовита сопственост, правно лице основано од странско физичко и правно лице, регистрирани во Централен регистер на Република Македонија, странски правни лица резиденти на држави членки на европската унија и на ОЕЦД, како и странски правни лица резиденти на држави кои не се членки на европската унија и на ОЕЦД а кои под услови на реципроцитет можат да стекнат право на сопственост на градежно земјиште на територијата на Република Македонија)“, информира Министерството за транспорт и врски. Министерството денеска објави оглас за продажба на земјиште и во Пехчево, наменето за изградба на откупен центар.