По изборите во САД запре трупањето на оружје кај граѓаните
Објавено во: Свет 10 Ноември, 2016
Американските граѓани на еден ден по изборите драстично го намалија купувањето на оружје кое го трупаа во изминатите месеци додека траеше кампањата. Повеќето компании за производство и продажба на оружје известуваат дека нивните нарачки се намалени за околу 15% во однос на летото кога кампањата беше во полн ек.
Според анализите на купувачите на оружје им олесна откако Доналд Трамп беше прогласен за претседател бидејќи тој ветува послаби контроли и почитување на вториот амандман од Уставот на САД кој предвидува вооружување за одбрана од тиранската власт.
Од друга страна Хилари Клинтон ветуваше поголеми забрани за продажба на автоматско оружје кое практично го користи и армијата и се залагаше за повеќе проверки на купувачите. Штом Трамп е нов претседател тогаш и нема потреба да се брза и да се трупаат арсеналите кои американските граѓани ги имаат во своите домови, доволни за да вооружаат цел паравојска.