По која цена се тргува нафтата пред празниците?
Објавено во: Економија 20 Декември, 2016
Нафтата се тргува во тесни граници денеска пред божиќно-новогодишните празници, бидејќи инвеститорите ги затвораат своите позиции, без да очекуваат да заземаат нови пред почетокот на 2017 година, соопштува Ројтерс.
Американската лесна сурова нафта WTI поевтинува со 0,13% до 52,99 долари за барел до 10:40 часот, а цената на европскиот репер Брент расте со скромни 0,04% до 54,94 долари за барел.
Инвеститорите велат дека почнуваат да го чистат билансот пред Бадник и Божиќ, како и една недела пред Нова година. Како резултат на тоа не се очекуваат големи движења во цената.
Синоќа излезе веста дека извозот на нафта од Саудиска Арабија е намален со 176.000 барели дневно во октомври. Тоа првично ја охрабри цената на суровината, но ефектот ослабна заради зголемувањето на извозот на рафинирани производи. Растечкото производство на рафинирани производи во монархијата е дел од еден поширока тренд, коментира Ројтерс.
Се очекува Азија да го пријави во 2017 година најголемото нето зголемување на капацитетот за рафинирање од три години, што ја поттикнува побарувачката на сурова нафта во најголемиот регион. Зголемувањето е за 1,5% на капацитетите за рафинирање.