По навредите од Албанија, Фатос Река повикан во МНР

Добивај вести на Viber

Во Министерството за надворешни работи на Република Македонија вчера е повикан на разговор Амбасадорот на Република Албанија во Република Македонија, Фатос Река. 

Во соопштението од МНР се наведува дека причина се „зачестените навредливи изјави и коментари од официјални лица на Република Албанија, насочени кон Република Македонија и нејзините граѓани“.

„На средбата беше потенцирано дека изјавите на Претседателот на Владата и Министерот за надворешни работи на Република Албанија за двонационалност и менување на уставното уредување на Република Македонија се отворено мешање во внатрешните работи на Република Македонија. Eтикетирањето на Македонците како „Славомакедонци“ е навредливо и дискриминаторски кон Македонците и сите граѓани на Република Македонија. Беше истакнато дека ваквите пораки се сериозна провокација за добрососедството кое сакаме да го негуваме. Тие прават долгорочна штета на односите во регионот и потткнуваат екстремистичка реторика. Она што ни треба во регионот, е обединување околу интеграцијата во ЕУ, мир и економски напредок“- стои во соопштението од МНР. 

Претходно во неколку наврати имаше навреди од албански политичари кон Македонија и Македонците. 

Премиерот на Албанија, Еди Рама употреби термин Славомакедонци, а за Албанците кажа дека се над 35% во Македонија. 

Претходно пратеничката Месила Дода Македонија ја нарече Илирида, и рече дека никој анти Албанец нема да ги плаши Албанците.