По средбата Заев-Ципрас Нимиц доаѓа во Скопје?
Објавено во: Македонија 22 Јануари, 2018
По средбата на македонскиот премиер, Зоран Заев со грчкиот премиер, Алексис Ципрас во среда во Давос, за десетина дена како што јави грчкиот јавен сервис ЕРТ, се очекува и посетата на медијаторот Метју Нимиц на Скопје и на Атина.
Двете Влади треба да го анализираат предлогот на Нимиц што им го достави на преговарачите од македонска и грчка страна.
По вчерашниот протест во Солун одржан под мотото „Македонија е една и грчка“, каде што околу 90.000 Грци рекоа „не“ за терминот Македонија во решениетоза името, а меѓудругото беше запалено и македонското знаме, со реакција се јави Македонското министерство за надворешни работи, но и грчките политички партии.
Од Македонското МНР истакнаа дека Владата на Македонија останува посветена на мерките за градење доверба со цел решавање на отворените прашања и изразуваат жалење за како што велат изолираните инциденти, како вчерашниот во Солун.
Инцидент имаше и во Мелбурн каде група Грци кои протестираа нападнаа Македонци кои носеа маички со македонски симболи.
Владата дејствува тајно и е неспособна да ги одбрани националните интереси, вели Кирјакос Мицотакис, претседателот на грчката опозициска партија Нова демократија коментирајќи го вчерашниот протест во Солун.
Од владејачката СИРИЗА, преку соопштение коментираат дека никој не го оспорува правото на граѓаните да учествуваат во протести, но и дека не е спорно дека на протестот учествуваа граѓани што немаат никаква врска со радикалната десница.