ПОЦ им го затворил паркиралиштето на пазарџиите пред протестот

Добивај вести на Viber

По денешниот протест на пазарџиите од Зелен пазар во центарот на Скопје, поради што се создаде голем метеж во сообраќајот, јавното претпријатие ПОЦ реагираше дека им го затворил паркиралиштето кај „Аутомакедонија“ затоа што било злоупотребувано и пренатрупувано со тешки товарни возила.

Денеска своето незадоволство преку протест го манифестираа сопствениците на тезги на „Зелен Пазар“ по што од ПОЦ апелираат до нив да ги прифатат новите мерки за решавање на проблемот со паркирањето на затвореното паркиралиште „Аутомакедонија“ кое се наоѓа во непосредна близина на „Зелен Пазар“.

– Со воведувањето на овие мерки ЈП Паркинзи на Општина Центар ќе стави крај на неправилностите кои се случуваа години наназад и ќе направи ред во паркирањето давајќи приоритет на жителите кои живеат во опфатот на паркиралиштето „Аутомакедонија“ кои заради сите овие злоупотреби не можат да го користат паркиралиштето во близина на своите домови бидејќи секојдневно се соочуваат со неподнослив проблем со паркирањето, стои во соопштението.

Според соопштението, пазарџиите кои редовно секоја година добивале повластена паркинг карта и картичка за влез за нивните автомобили, тие истите ги користеле за тешки товарни возила. Порачуваат дека „Скопски Пазар“ треба да обезбеди дел од својата парцела за потребите на своите закупци на тезги.