Поголем девизен прилив од странските туристи годинава
Објавено во: Економија 13 Септември, 2018
Девизниот прилив од туризмот во првата половина од годинава порасна за 26,6 отсто во споредба со истиот период лани или со вкупен износ од 151,3 милиони долари.
- Континуитетот во зголемувањето на девизниот прилив од посети на странски туристи се должи на мерките и активностите кои се преземаат од страна на целиот турстички сектор во земјава. Покрај медиумската кампања во странски земји што беше спроведена од Агенцијата за промоција и поддршка на туризмот на Република Македонија (АППТ) и која обезбеди интензивна промоција на Македонија на различни странски пазари, бројни активности беа преземени и за промоција на земјата преку организирани посети на тур-оператори, туристички агенции и странски новинари, велат од АППТ.
Овој тип на промотивни активности, додаваат, ја интензивира промоцијата на земјата на ефикасен, а истовремено, достапен начин.
Дополнителна промоција на земјава се остварува и преку пласман на различни видови на поддршка на приватниот сектор во поглед на проекти преку кои ќе се засили и збогати туристичката понуда, потенцираат од АППТ и порачуваат дека се очекува во 2018-та да биде регистриран најголем пораст досега во бројот на туристи и ноќевања.