ПОЛИТИКО: Заев се соочува со уникатни предизвици и има застрашувачка листа на задачи

Добивај вести на Viber

Еден западен дипломат, кој сакаше да остане анонимен, го нарече новиот македонски премиер, Зоран Заев  „најдобрата шанса што оваа земја досега ја имала“, пишува Политико во анализа за Македонија.

Како и повеќето од нејзините балкански соседи, оваа земја од околу 2 милиони луѓе е меѓу најсиромашните во Европа и страда од длабоко вкоренет организиран криминал, широко распространета корупција и слабо владеење на правото, се наведува во анализата. 

Дури и според регионалните стандарди, Заев има застрашувачка листа на задачи.

Но, Заев, 42-годишен бизнисмен што никогаш немал висока функција, се соочува со предизвици што се уникатни за Македонија. Тоа се спорот со соседна Грција околу името на земјата, што го блокираше нејзиниот пат кон ЕУ и НАТО, несогласувањето со Бугарија во врска со историјата и јазикот, деликатните односи меѓу двете најголеми етнички групи и јавна администрација полна со службеници лојални на претходната Влада.

„Насилството поттикна промена кај претседателот Ѓорге Иванов, кој неколку месеци одбиваше да го назначи Заев за премиер, дури и кога овој состави мнозинска коалиција по парламентарните избори. Иванов рече дека се плаши дека Заев ќе направи многу отстапки за етничкото албанско малцинство во Македонија, но во мај конечно му дозволи на водачот на социјалдемократите да формира влада“ - стои во анализата на Политико за нашата земја.