Добивај вести на Viber
Плоштадот Таксим и паркот Гези во Истамбул се под целосна опсада на полицијата и не се дозволени да поминат ниту луѓе,ниту возила, јавија светските медиуми.
Полицијата ги блокирала сите патни правци во центарот на Истанбул, околу плоштадот Таксим и соседниот парк Гези, кој во изминатите денови беше окупиран од учесниците на протестите.
Над 500 илјади вработени во јавниот и производствениот сектор во Турција започнаа генерален штрајк против владата, во знак на протест против активностите на полицијата при задушувањето на протестите за паркот Гези.
Полицијата ги предупредила демонстрантите од главните турски синдикати да ја сопрат блокадата на главната авенија во Анкара или ќе интервенира со водени топови.
Турската полиција уапсила околу 500 лица во Истанбул и Анкара, поради судирите на полицијата и демонстрантите, кои повеќе од две недели протестираат против Владата.
Турскиот министер за внатрешни работи, Муамер Ѓулер изјави дека дел од полицијата ќе продолжи да учествува во задушувањето на антивладините демонстрации, посочувајќи дека штрајкот е незаконски.
За време на полициската акција уапсени се 441 лице во Истанбул поради поврзаност со вчерашните судири и 56 демонстранти во Анкара кои се поврзуваат со антивладините протести во изминатите денови.
Италијанскиот фотограф Даниел Стефанини е ранет во Истанбул во текот на синоќешните судири на демонстрантите и полицијата, а подоцна бил уапсен, соопштила италијанската амбасада во Турција.
Дваесет и осумгодишниот Стефанинин бил ранет во округот Бајрампаша, а еден адвокат му помогнал и го префрлил во локалната болница, каде подоцна турската полиција го уапсила.
Од Здружението„Солидарност за Таксим“ најавија дека ќе продолжат со антивладините протести кои ќе траат се додека полицијата не ги запре нападите против нив.