Полска е се поблиску до загубата на правото на глас во ЕУ
Објавено во: Свет 26 Јули, 2017
Проблемите меѓу Европската комисија (ЕК) и Полска се продлабочуваат. Во средината на јуни ЕК започна правна постапка против Полска, Унгарија и Чешка, бидејќи трите држави одбиваат да прифатат бегалци. Во средата, пак, заменик-претседателот на Комисијата Франс Тимерманс, цитиран од EUObserver, објави дека ЕК е подготвена да преземе нови мерки против Варшава. Причината овој пат се спорните закони за реформа на полското судство, кои според критичарите ќе ја поткопаат независноста на судството во земјата и поделбата на власта.
По масовните протести полскиот претседател Дуда во понеделникот изјави дека ќе стави вето на два од трите закони, кои предвидуваат отпуштање на членови на Врховниот суд и зајакнување на овластувањата на парламентот во однос на Националниот совет на судството. Во рок од два месеци се очекува Дуда да предложи нови закон-проекти. Парламентот во Варшава може да го поништи неговото вето, но за тоа ќе мора поголемо мнозинство од владејачката партија "Право и правда".
Во вторникот, меѓутоа државниот шеф на Полска го потпиша третиот закон со кој ќе му овозможи на министерот за правда да ги отпушта претседателите на Пониските судови.
ЕК се очекува да ја објави третата листа со препораки за правните реформи на Полска во рамките на дијалогот помеѓу Комисијата и Варшава за владеењето на правото. Полска ги игнорира претходните два листа со препораки, опишувајќи ги како политичка интервенција. Постои веројатност овојпат ЕК да одреди краен рок, после кој, ако полската Влада не ги исполни препораките може да биде активиран Член 7 од Договорот за Европската унија.
Според наведениот член ЕК може да поднесе предлог во Европскиот совет, кој по обезбедување на мнозинство од четири петтини од своите членови и добивање на одобрување од страна на Европскиот парламент (ЕП), може да констатира присуство на очигледен ризик од тешко нарушување од страна на одредена земја членка на вредностите на Европската унија (ЕУ). Ако биде констатиран таков ризик, Советот може со квалификувано мнозинство да донесе одлука за запирање на некои права што произлегуваат од примената на Договорите во однос на засегнатата земја-членка, вклучително и на правото на глас на претставникот на владата на таа земја-членка во Советот .