Понуда „тешка“ 18,6 милијарди долари: Камионите на VW излегуваат на берзата

Добивај вести на Viber

Фолксваген го процени својот бизнис во секторот на тешки камиони на дури 18,6 милијарди долари во рамки на планираните иницијални јавни понуди (IPO).

Како што пренесе Блумберг, акциите на компанијата „Traton SE“, дивизијата на VW која продава возила од марката „MAN“ и Сканија, ќе бидат понудени по цена од 27 до 33 евра по акција, со што вредноста на тој бизнис ќе достигне од 13,5 до 16,5 милијарди евра.

Тоа, како оценува њујоршката агенција, ќе биде едно од најголемите европски излегувања на берзата во оваа година.

Листирањето на акциите на „Traton SE“ се и еден од најважните механизми на менаџментот во рамки на настојувањето најголемиот произведувач на автомобили во светот да се направи агилен.

Меѓу плановите на менаџментот е и потенцијална продажба на имот и потрага за нови кооперации.

Блумберг пишува и дека извршниот директор на VW Херберт Дис разгледува продажба на претпријатието за производство на бродски мотори, како и здружување со Форд во областа на производство на комби и електрични и автономни автомобили.

-Плановите на VW за Тратон и за соработка со Форд ќе помогнат да се создадат „пари“ за претстојната фаза на консолидација на индустријата-рекол Дис на седницата на менаџментот.

VW на листирање на акциите на „Тратон“ работи повеќе од три години, за да минатиот месец ги оживее плановите од кои се откажа претходно оваа година.