Поради брзиот начин на живот дали домаќинките имаат време да месат леб?

Добивај вести на Viber

Деновиве топ тема е цената на лебот. Владата ја замрзна на 33 денари, пекарите вчера не донесоа тазе леб во маркетите, а многу граѓани на социјалните мрежи пишуваат дека и самите можат да си месат леб.

Но, во трката со сите обврски, работа, чување на деца, ги прашавме жените дали практикуваат да месат леб. Светлана Петковска, претседателка на Организацијата на жени на Општина Битола вели дека таа на свои 62 години повремено меси, но смета дека жените денес немаат толку време за да подготвуваат домашен леб. Сепак, објаснува дека ако треба да бираат меѓу купен и домашен, би го избрале домашниот леб.

„Темата е многу комплексна и тука станува збор за прашање на време, волја и потреба. Младите сè помалку јадат леб, а старите сè повеќе. Младите жени, мајки, домаќинки, немаат време да месат леб. Дел од нив не знаат да месат. Знам три фамилии кои купија мини фурни, но кратко ги користеа. Ако сакате да направите убав леб, квалитетното брашно е 40 денари килограм, треба да вклучите рерна за да го подготвите, но и да изгубите три часа додека да се замеси, размеси, испече. Дури и во руралните средини, сите жени не месат домашен леб, туку си купуваат. Ако обработуваат ниви, чуваат стока или одат на работа, полесно им е да купат леб. Доколку се работи за двајца луѓе, ако еднаш неделно месат домашен леб, ќе треба да го замрзнуваат и прашање е колку е тоа практично“, рече Петковска.

Славица Паланкова од струмичкото село Муртино вели дека таа не меси леб, туку си купува.

„Порано со свекрвата месевме, но сега немам време. Во селото некои жени месат, а некои си купуваат леб. Додека да се подготви леб се потребни два часа, но и електричната енергија е поскапена, сметките се високи“, кажа Паланкова.

Николина Јанкулова, која живее во селото Блатец и е членка на здружението „Златно доба“ од Виница вели дека најважна е волјата, дали жените сакаат да месат леб или не.

„Имам 78 години, сама сум и си месам леб, затоа што купениот не можам да го јадам. Ние пензионерите имаме слободно време, но младите немаат толку многу време. Во селото повеќето жени си купуваат брашно, си имаат фурни, си прават домашен леб, со исклучок на младите кои се зафатени или старите кои се изнемоштени. Да се меси леб воопшто не е тешко“, објаснува Јанкулова.

Вработените жени велат дека дури и ако знаат да подготвуваат домашен леб, поради работните и домашните обврски, на тоа можат да се посветат во викендите.

„Јас не знам да месам, додека сестра ми знае. Постарите жени велат дека е лесно да се направи домашен леб. Повеќето жени што ги знам си купуваат леб, ретко некоја да меси, но дури и кога би знаела да месам, тоа би можела да го правам попладне, после работа или за време на викенд“, објаснува жена од Крушево.

Цената на лебот е замрзната до крајот на мај, но заканите за празни рафтови се остварија. Владата ја замрзна цената на белиот и полубелиот леб на 33 денари, откако пресметале дека дел од поскапувањата се неоправдани. Tие како аргумент  го наведоа и тоа што ист леб се продава по драстично различни цени низ земјава – од 28 до над 45 денари. Владата ја укина и субвенционираната струја за прехранбената индустрија.

foto freepik.com/pch.vector