Повикани на помош експерти од Германија за да го оправат Фондот за здравство
Објавено во: Македонија 16 Февруари, 2023
Премиерот Димитар Ковачевски денеска пред медиумите рече дека Фондот за здравствено осигурување подлежи на хакерски напад кој е дел од хибридната војна што се води на европско тло паралелно со војната во Украина и дека се повикани на помош експерти од Германија и од други партнерски земји.
Цели десет дена софтверот на Фондот за здравствено осигурување е во колапс, а овој проблем направи досега невиден хаос во државата. Погодени се и здравствените работници и граѓаните осигуреници кои се приматели на здравствените услуги. И едните и другите велат дека нефунционирањето на еден ваков сериозен систем е показател колку државата забрзано тоне и како настанува непоправлива штета во сите сегменти.
- Тимовите на Министерството за здравство, на Фондот за здравство пред се, меѓутоа и на други институции, работат заедно со експерти и професионалци од Германија и од други партнерски земји, со цел да се реши проблемот со хакерскиот напад. Во овој момент не може да функционира трезорот и исплатата од Фондот по различни основи, рече Ковачевски како одговор на новинарско прашање.
Тој додаде дека со Министерството за финансии се разговара да се активира централниот трезор во една комплексна операција.
- Доцна синоќа разговарав со министерот за финансии, иако во наредните денови ќе се најде решение, за можноста да се исплатат платите преку централниот трезор, а потоа да се направи порамнување со трезорот во Фондот за здравство. Се работи за комплексна операција, а јас упатувам апел до сите вработени и корисници на услугите да имаат трпение. Деноноќно се работи за овој проблем да биде решен, порача тој.