Повисоките цени ги зголемија приходите на патарините за 35%

Добивај вести на Viber

Износот на прибраните средства од наплата на патарини е зголемен за 35% од 11 овој месец, кога се зголеми цената на патарините затоа што престанаа да важат антикризните мерки, се пофали директорот на Јавното претрпијатие  за државни патишта Љупчо Георгиевски. „Ако средствата се зголемени за 35 проценти, а враќањето на цените од пред 2008 години беше некаде од 27 до 32 проценти, имаме  зголемување на сообраќајот колку разликата, од 5,9 проценти. Кај регистрацијата имаме зголемување од над 40 проценти, што значи дека доста од граѓаните во овој период ги регистрираат  возилата“, вели Георгиевски. Тој денеска ја презентираше мобилната апликација за следење на состојбата на патарините и граничните премини, што за Јавното претпријатие за државни патишта ја изработи дипломираниот економист од Тетово Даниел Радевски и која се очекува особено во текот на летните месеци да им биде корисна на граѓаните кои се подготвуваат да патуваат. Во екот на туристичката сезона, уште еднаш како „тесни грла“ се потврдуваат наплатните станици Романовце кај Куманово и Градско после Велес. „Според информациите од соседните држави ако  во Србија, Хрватска... се чека по час или два на одредени патни правци кон туристичките дестинации, кај нас тоа е од пет и во најлош случај до 20 минути“, вели Георгиевски, потсетувајќи дека патарините се проектирани пред многу години кога е граден автопатот и  според тогашната проценка за бројот на возила. Веќе се прават планови за зголемување на капацитетот на наплатната рампа кај Романовце. „Оваа патарина треба да биде поместена 300 метри кон Куманово, а сегашните четири премини да се зголемат на девет. Истото треба да се случи и кај Градско, а секако  предмет на реконструкција ќе бидат и сите останатите патарини“, појаснува Георгиевски. Во модернизацијата на патарините ќе бидат инвестирани 15 милиони евра.