Повторно одложена седницата за ревизорот, ќе има ли кој да го контролира работењето на државата?
Објавено во: Македонија 27 Септември, 2019
Илија Димовски, претседателот на собраниската Комисија за именувања, повторно ја одложи седницата за избор на нов државен ревизор, овој пат на барање на пратеникот на СДСМ, Мухамед Зекири, кој побара одложување затоа што, како што наведе тој, 8-те назависни пратеници од ВМРО-ДПМНЕ имаат барање за нова распределба на силите во собраниските комисии.
Димовски го одобри барањето со образложение дека остава простор за договор. Според ова, се уште не е постигнат договор помеѓу СДСМ и ДУИ за прв ревизор, но исто така на изборот своето влијание го наметнуваат и други политички групи.
Македонија речиси две години нема директор на Заводот за ревизија, мошне важно тело кое ги испитува неправилностите во работењето на државните управни органи, Собранието, болниците, партиите итн.
На заменик директорот мандатот му истекува на 4 октомври и ако до тогаш не се избере прв човек институцијата од наредниот петок ќе биде во целосна блокада без можност да им се исплатат плати на вработените и да изготвува ревизорски извештаи
Клучното прашање што се поставува е дали ќе се избере компетентен прв човек, или, пак, партиите ќе притискаат за свои решенија, сакајќи да воспостават влијание во оваа значајна институција.
И минатата седница пред неколку дена беше одложена и презакажана, а изговор, исто како и денеска, беше барањето за правилна прераспределба на независната група на пратеници на ВМРО-ДПМНЕ.